هل أحدث مسلسل المداح حقيقة؟.. اكتشف الحقيقة

نشر أحد المحللين الصحفيين عبر صفحته الشخصية عبر فيس بوك حقيقة أحداث مسلسل المداح بطولة النجم حمادة هلال، وذلك بعد نجاح المسلسل في الموسم الدرامي وشكوك البعض الأحداث التي تحدث في مسلسل المداح.

حيث أوضح الكاتب حقائق الإيمان بالإله الواحد والإيمان بالنفس سر الوصول.

 

حيث كتب :

علم الجفر؟!..
تاج.. عماد !…

رحلتنا مع عالم المداح النهاردة هتكون رحلة قصيرة لكن فيها الخلاصة.. والغاز بتوضح اكتر… وشخصيات بدأت تتضح أهدافها والطريق اللي ماشيه فيه.. زي تاج كده؟ هنعرف النهاردة هي في أي فريق..

فريق الخير ولا فريق الشر و الدجال وأعوانه من شياطين الإنس والجن!..

ف يلا بينا ندخل في عالم صابر المداح

من أهم مشاهد الحلقة النهاردة.. مشهد الدكتور إبراهيم وصابر.. لانه بيوضح لنا ايه هي ماهية الرموز واللغة اللي اتكتب بيها كتاب الوعد؟

الجفر؟!

كتاب منسوب لسيدنا علي ابن عم سيدنا النبي محمد عليه أفضل الصلاة والسلام.. كتاب اتكتب فيه علوم سيدنا النبي.. واختص العلم ده لسيدنا علي.. ومعنى كلمة الجفر جلد ( الماعز أو الغنم) فالاسم اتاخد من المادة اللي اتكتب عليه الكتاب.. يعني الكتاب اتكتب على جلد ماعز.. وكتاب الجفر موجود فيه نصوص بتخبرنا بالأحداث والفتن اللي هتحصل في آخر الزمان ولحد قيام الساعة..

الكتاب اتكتب بالرموز والأرقام والحروف.. بحساب اسمه حساب الجمل؟ وده حساب لكل حرف بيوافقه رقم معين.. فبيتم جمع الحرف ده بالرقم عشان يخرج لنا في الاخر عبارة او مدلول معين!..

الجفر اتكلم عن التلات عقائد المسيحية واليهودية والإسلام.. يعني اتكلم عن كل عقيده فيهم وكتب الفتن والمواقف اللي هتحصل في المستقبل..

أنواع الجفر؟

الجفر الصغير: وده بيعتمد على ترتيب الحروف الأبجدية بطريقة ( أبجد هوز) و بيتسمى بالتكسير الصغير.. ودي طريقة جعفر الصادق..
النوع الثاني الجفر الكبير وبيعتمد على ترتيب أحرف الأبجدية بطريقة ( أ- ب- ت- ث) ..

والجفر كتاب عبارة عن 28 باب.. وفي كل باب 28 صفحة.. وفي كل سطر 28 خانة.. ولكل بيت اربع احرف.. الحرف الأول للخانة.. والتاني للسطر.. والتالت للصفحة والرابع للباب.. وده محسوب بحساب الجمل.. وحساب الجمل ان لكل حرف أبجدي ليه قيمة عددية معينة.. بيتم احتسابها عن طريق جدول..

وبالمناسبة حساب الجمل بيستخدمه السحرة في أعمال السحر.. بيحسبوا اسم اللي هيتم عمل السحر ليه.. بطريقة حسابية وفقا للحروف والأرقام والفلك!.. يعني بيعتمد على اليوم والشهر القمري والنجوم!.. وده اسمه التنجيم!..

كمثال لو حسبنا كلمة قرآن هنلاقي الآتي..
ا+ل+ق+ر+ا+ن
1+30+100+200+1+50= 382
وده بطريقة حسابية اسمها المقاليب.. أي قلب القيمة العددية للكلمة عشان يتم في الاخر استخراج سر الكلمة!..

وده أسمه علم باطن القرآن…

نرجع للدكتور إبراهيم..
بيبدأ يفهم صابر ان الورقه اللي كتبتها مكتوب فيها ( الإيمان بالإله الواحد والإيمان بالنفس سر الوصول ) ولما سأله صابر عن رقم ( 11 ) ايه المقصود بيه ؟ فهنا طلع له كتاب الجفر؟ اللي بدأ الدكتور يقول له ان ده علم مورث من سيدنا علي.. وان الحروف اللي بتكتبها.. وكتاب الوعد مكتوب بنفس الطريقة اللي اتكتب بيها الجفر.. ووصولك لحل الرموز هو كتاب الجفر…..

أما عن الرقم 11 ؟

فقال له ان رقم بداية الوصول للقوة.. يعني انت خلاص في طريقك للوصول.. وان أرقام الوصول للبدايات هي 1.. 11.. 1111.. وده معناه ان خلاص صابر علقه بدأ ينشط ويفهم الرسايل اللي بتتبعت له..

في اللحظة دي صابر افتكر حاجة؟ وهي انه شاف على ساعة العربية انها 2:22 وهي أصلا مكانتش كده؟! فالدكتور إبراهيم فسر له ان رقم ( 2 ) بيعني التشتيت وانك مش على أرضية صلبة.. ومحتاج تقوي نفسك بالإيمان بالله.. وزي ما فعلا جاله قرينه وماقدرش يقرأ القرآن.. لأنه ضعف.. صابر إيمانه بالله ضعف ومحتاج انه يستعين بالله ومايفكرش غير فيه.. وربنا هو اللي هيوصله لرحاب وابنه والكتاب.. وهيقدر يحارب كل شيء شر حواليه.. وزي ما أبوه قالهاله ( انت بعدت يا صابر) ايوة بعد ومحتاج للخلوة مع ربنا..

الأمير هو طريق صابر للوصول لهند بنت الأحمر ؟!

بيتفاجئ الدراع اليمين للأمير في كل شغله بصفقة من شخص مجهول بأرقام كبيرة! ويطلع مين هو ده؟ هو هايم؟ هايم الشيطان عشان هو بينفذ آخر توجيهاتها ليه! عشان يوصل لصابر..

صابر فهم لعبة أحلام؟ لكن أحلام بتشككه في مراته!

صابر بيطلب من أحلام تقرأ له الفنجان.. بس فنجالها هي! لكن هي بترفض لانها شيطانه هي مابتقراش فنجال هي بتبخ فيهم سم ووسوسة شياطين عشان يتشتت اكتر.. وده اللي كانت بتعمله مع حسن عشان تبعده عن صابر.. ونجحت في ده.. لكن صابر فهم.. وهي بقى بقت تلعب على المكشوف.. وتقولهاله ببجاحه انا عارفاك يا صابر من قبل ما أتجوز حسن.. يعني على بلاطه بتقول له انا جايالك انت.. جيالك عشان افركش لك أهلك.. لحد ما يبعدوا عنك!..

ونجحت في ده فعلا!..

حتي في النهاية تقولها له في وشه روح شوف مراتك مع مين؟ وهنا هي بتلمح على زين.. وبيزيد شك صابر لما يشوف قايمة الأرقام اللي اتصلت بيها رحاب.. عشان يتصدم بزين! وهنا توقيع بينهم!.. بس صابر أكيد فاهم اللعبة وعارف ان ده كله لعب شياطين!..

وأكيد أحلام لما أدت رحاب رقم جديد.. كان الرقم متسجل باسم زين! عشان يشك فيها ويقوم ايه؟ يقت..لها مثلا هي وابنها!..

هنفذ النهاردة..

ابن صابر تعب..
وأحلام هتاخده توديه للدكتور بس هي مش هتوديه للدكتور هي هتوديه لهايم! عشان المقبرة!…

والواد تعب بسبب أحلام!..

بس يا ترى هتنجح أحلام ؟ ولا صابر هينقذ ابنه ؟!

تاج تبع هند بنت الأحمر..
عماد!..

خلاص الشكوك ناحية تاج وضحت..
واتعرفت هي في صف مين..
لأنها قابلت عماد! أو قرينة..
عشان تقوله
كنا لازم نقعد مع بعض من بدري؟!

يا ترى هتكون في صف شياطين هند بنت الأحمر ؟
ولا عماد وتاج من الجن اللي بيساعدوا صابر؟!

أنا رايي انها في صف هند بنت الأحمر..
والوحيد اللي مع صابر هو الدكتور إبراهيم..