أسطورة العشق صابر المداح ٣

 

بقيت مستغرب نفسي معاكي يا تاج!.. 

أنا بقيت زي المسحور بجري عليكي كل شوية!.. 

صابر عشق تاج!.. 

بقيت مستغربك يا صابر.. إزاي انت بتقول مافيش حاجة بيني وبين تاج.. وفي نفس الوقت باين أوي إنك بقيت مجذوب لها.. وبترتاح في وجودها.. حتى الجملة اللي قولتها لتاج اني بقيت أرتاح معاكي.. انا بقيت مسحور بيكي! ده باين عليك أوي انك عشقتها! وشكل الصراع هيكون بينك وبين تاج ورحاب في النهاية.. والمقابل هو أبنك عز!.. 

تاج بتساعدك عشان عايزاك ليها.. عايزاك حبيبة وعاشقة.. وفي النهاية لما تقدر توصلك للمقبرة هيكون هنا المساومة.. ما بين أنك تختار تاج أو تخسر رحاب وعز ابنك!.. 

وانت للأسف ماشي وراها وسحرها بقى يتمكن منك اكتر واكتر!.. 

أو يمكن بيعمل كده مع تاج عشان يقدر يفهمها ويعرف ليه هي يتساعده وهدفها ايه؟!

رحلتنا في عالم صابر المداح هتكون رحلة قصيره لكن برضه زي ما عودتكم دايما انك تقرا الخلاصة عندي.. 

ف يلا بينا ندخل في عالم صابر المداح… 

الحلقة بتبدأ بصابر وهو شايل ابنه.. وللمرة الأولى أبنه مايخفش منه ومايعيطش زي كل مره.. وده بسبب ان صابر مبقاش عنده خوف ولا شك من ناحيته.. خوف صابر من أبنه كان بيتنقل لعز فهنا بيحس بطاقة الشر والشياطين اللي حواليه فهنا يخاف عز ويعيط!.. 

لكن لما صابر مبقاش خايف من ابنه ومبقاش يسمع للشياطين اللي حواليه فهنا اطمن لأبنه.. 

أما عن رحاب فبتبلغه أنها خايفه ان تكون زي أمينه.. عاشقها جن وعز يكون أبن الجن ده! لكن صابر هنا بيضايق من كلام مراته ويبلغها ان هي مش زي امينة.. أمينة حاله مختلفه!.. 

عماد ما هو إلا حلم في عقل عائشة؟!

عائشه بتصحى من النوم على صوت عماد.. وعماد يأكدلها انه مش حقيقي.. ده حلم مش اكتر.. و يوصيها تفضل مع صابر.. وهو نادم على اللي عمله زمان لما عمل عقد مع الشيطان.. 

المشهد ده بيدل ان عماد أو وليد جاي لصابر في صورة عماد عشان يساعده ويكفر عن الذنب اللي عمله.. لكن هو في نفس الوقت مش قرينه.. 

لان القرين معروف انه كا–فر وعمرك ماهتشوف من شيطان خير لبني ادم!.. 

فاللي ظهر ده جن مسلم جاي في صورة عماد عشان مساعده.. ويكون يعني بيمثل ضمير عماد اللي ندم في الجزء اللي فات وهو بيتحرق!.. 

ومن ناحية تانية منال اللي خلاص بقت واحدة ماشية من غير عقل.. كأنها منومة مغناطيسيا.. او عروسة بتتحرك زي ما صاحبها عايز.. وده كله من سحر أحلام ليها.. منال بقت تنفذ كل أوامر أحلام بالحرف.. حاولت تشكك صابر في رحاب وانها كانت تعرف انها في شقة زين! ودلوقتي منال بتشكك رحاب في صابر انه بيحب عليها تاج وهيتجوزها زي ما أخوه حسن عمل! وكمان بلغتها أنه مع تاج دلوقتي.. 

عشان بعدها تروح فعلا لصابر وتلاقي تاج معاه وتسمع كلامه اللي خلاها فعلا تتأكد ان صابر وتاج بينهم حاجة.. واللي ساعدها في تأييد شكها صابر نفسه اللي بقى مسحور بتاج وعشقها ليه!.. 

وده كله هيضيع منه رحاب والأهم ابنه…

لان منال ممكن جدا تاخد أمر من أحلام بخطف عز!.. وده ممكن يحصل جدا!.. 

أما عن الأمير بقى فتأكد أنه قلب على صابر بسبب خوفه على بنته ” دارين ” اللي هند بنت الأحمر هددته لو رجع لطريق الخير بنته هيكون مصيرها الم–وت! حتى إنه قال لعاصم انت بتحبها خلي بالك منها؟ وده إشارة أن الأمير هيرجع للصواب ف وصى عاصم أنه ميسبهاش!.. 

هنشوف هيرجع فعلا للصواب ولا هيكمل في صف هند بنت الأحمر!.. 

أما بقى عن هايم فتاكد لنا انه مش مجرد شيطان من شياطين الإنس.. لا هو فعلا شيطان.. لانه لما قابل حسن وكشف له ان المقبره اتفتحت وكان عارف ان حسن بيخدعه.. ولما حسن قال له انا اتغفلت واتسرقت زيك.. فهنا هايم يقوله لا انا ماتغفلش ومش حرامي زيكم.. ولما اداله حقه قال له تأكد انه شيطان بوصفه بانتم طماعين ومش بترجعوا الحق لحد.. فده يقول لك إن نظرة الانا وغرور إبليس فيه!.. وكرهه لبني آدم ونسله!.. 

هو الأمير اللي قابلته بعد ما رجع هو نفسه الأمير اللي قبلته قبل كده؟!

عصام بيقابل صابر ويبلغه شكوكه حوالين الأمير.. بانه كان ليه بنت هجراه من زمان وهو مكنش فارقه معاه.. لكن لما ربنا تاب عليه من سكت السحر والشعوذة.. بقى يدور عليها لكن كانت رافضه تقابله.. لكن لما أختفى كانت هتتجنن عليه.. ودلوقتي الأمير نفسه رافض يقابلها.. وغير انه اكتشف ان هايم والأمير حبايب.. 

وده كله شككه أن الأمير اتغير ومبقاش هو الأمير!.. 

فعشان كده سأله السؤال ده!.. 

هنا تاخدنا النظرية أن الأمير اتغير خوفا على بنته.. وبقى في طريق هند بنت الأحمر وهايم عشان لو معملش كده بنته هتتأذي منهم!.. 

فلازم صابر مايصقش في كلام الأمير غير بقى لما يرجع لصوابه.. 

وأنا اعتقد أنه هيرجع واللي هيحمي بنته هو صابر نفسه… 

هنشوف وهنعرف كل ده في الحلقات الجاية بس هما يسرعوا في الأحداث اللي بقت أحداث ماشيه برتابة..

في النهاية حابب أقولكم حاجة.. 

مش صابر بيقرب لتاج اكتر؟ وصابر نفسه مبقاش مفهوم؟ يعني أوقات قوي واوقات ضعيف.. كلمه تجيبه وكلمه توديه.. وغير انه لسه ماعلجش أمينة.. 

علاقته بمراته بتسوء اكتر واكتر.. 

أبنه ماعيطتش معاه وده لأول مره تحصل؟

هنا اللي حصل لصابر هياخدنا لنظرية غريبة انا نفسي مش مقتنع بيها لكن حبيت أقولها ونفكر مع بعض.. 

النظرية هي ان صابر ده مش هو صابر؟ 

وصابر اتغير من يوم ما قابل قرينه.. وصابر متقيد أو محبوس!.. 

ويمكن ابنه ماعيطش معاه عشان مش صابر اللي شايله!..

وان ابنه ممكن يكون ابن الجن اللي شافه في بيت أبو رحاب القديم! والواد يكون ابنه؟

نظرية غريبة اه بس يمكن دي هتكون نهاية المسلسل انهم يجيبو صابر وهو متسلسل ويتفك في الأخير في وقت فتح المقبرة؟!

سلام..

تحليل ا.محمدمهني