اسطورة العشق المداح

صابر لازم يعرف كل حاجة؟!

 

رحلتنا مع عالم المداح هتكون رحلة قصيرة لكن بالرغم من كده في رسايل والغاز بتوضح لنا اكتر… وشخصيات بدأت تضوح أهدافها والطريق اللي ماشيه فيه..

 

ومتهيالي عرفنا تاج تكون مين؟ وجاية ليه؟ وعرفنا برضه عماد أو الجن المتجسد في عماد؟!

 

بتبدأ حلقة النهاردة بتاج و وليد.. وهما في الاتيليه بتاعها.. وبيبدأوا يتكلموا مع بعض ان المقابلة دي كانت لازم تحصل من بدري..

ووليد بيقولها كل حاجة مترتبة.. لكن تاج بتقوله بس على الأقل كنا نعرف كل واحد بيعمل ايه؟ وهنا وليد يقولها لازم صابر يعرف كل حاجة.. والكلام ده ليا وليكي؟

 

يا ترى ايه هي الحاجة اللي صابر لازم يعرفها؟!

 

قبل ما نتوقع ايه هي الحاجة دي خليني اقولكم توقعي أو تحليلي للمشهد ده.. وهيكون تحليلين وانتم تختاروا منه المنطقي بالنسبة لكم.. وكالعادة هقول لكم التحليل اللي انا معاه..

 

التحليل الأول ان تاج وعماد جن.. ومن قبيلة واحدة.. وجايين لهدف واحد لكن كل حد فيهم شغال في طريق مختلف.. واللي يثبت الكلام ده ان تاج قالت له ( على الأقل كنا لازم نعرف كل واحد فينا بيعمل ايه)..

 

الجن أصلا قبائل.. وكل قبيلة بيحكمها حد معين.. ملك.. زي بني الأحمر ليهم قائد وده الملك الأحمر اللي بنته هي هند.. وهند دي هي ملكة القبيلة دي.. وليها اتباعها زي هايم و أحلام..

 

أما تاج فمن قبيلة تانية وعماد وممكن الأمير كمان من نفس القبيلة.. وكلهم ماشيين في طريق واحد وهو الوصول للمقبرة.. عشان كل قبيلة عايزه القوة اللي مع صابر.. والشاطر بقى هو اللي يلحق..

 

لكن هند قدرت أنها تخطف الأمير وتحطه في طريقهم وبقى معاهم.. حتى أنها قالت معايا اللي هيحط صابر للطريق.. وهو الأمير.. لان هي عارفه ان صابر بيثق جدا ف الأمير..

 

يعني نقدر نقول ان الكل بيلعب عشان يوصل لهدفه قبل التاني… تاج ماشيه في سكت صابر وبتوصله للدكتور إبراهيم.. وده عشان هي عارفة ان الطريق هيكون مع الدكتور..

 

أما الكلام اللي لازم صابر يعرفه؟

 

توقعي أن تاج عارفه طريق المقبرة اللي ممكن تكون. موجود في معبد دندرة.. لأنها قالت في حلقة لصابر عايزه تروح لها.. فممكن أصلا تقوله على الطريق.. عشان بقى تبين له نيتها في الآخر..

 

أما التفسير التاني ان هي بتعشق صابر وبتساعده عشان تنوله في الاخر.. فهتفضل باين له انها المساعده ليه.. عشان في الآخر يحصل الصراع بينهم.. وتساومه ما بين ابنه ورحاب..

 

أو يكون ليها وابنه مايتأذيش!..

 

من ناحية تانية حسن لسه واقع في سحره وطمعه.. وحاول ياخد البيت من هايم.. عشان يفتح مقبرة اثرية.. والدجال قال له عايزين دم! دم بني آدم! فهنا أنصدم.. لكن حسن مايعرفش انه بيتعامل مع شيطان.. فعرف نواياه.. وبعت المساعد بتاعه وخلص في البيت.. والحركة دي هي اللي هتقضي على حسن..

 

ومن ناحية تانية مساعد الأمير اللي قدر يعرف اسم شركة هايم وهي الفرسان؟

 

ولو جينا نربطها بفرسان الهيكل؟ ودي جماعة صليبية اتاعملت أيام الحروب المسيحية.. وهدفها الدفاع عن المسيحية.. لكن ده مش صح.. دول جماعه اتعملت بهدف هيكل سليمان.. لان اتقال ان اللي بنى هيكل سليمان واحد اسمه ( حيرام ابي) وبعدها عمل جيش اتسمى ب فرسان الهيكل.. وبعد موته والقضاء على الهيكل.. اتباعه بيبحثوا عن الهيكل ده..

 

ولو بصينا ان المسلسل اتذكر فيه تابوت العهد واهو فرسان الهيكل.. يبقى الموضوع كبير وفي إشارات تحذيرية!..

 

نروح لرحاب لسه في التوهة بتاعها.. وزين بيحوم حواليها.. مش عارف هتفوق امتى قبل ما أبنها يتأذي!…

 

ومن ناحية تانية هبة اللي بجد صعبانه عليا جدا البنت انتهت خلاص! اتجننت للأسف!..

 

ومن الناحية التانية الدكتور إبراهيم بيبحث ورا المقبرة وبيقارن بين الخريطة اللي رسمها صابر وبين الكتاب اللي عنده.. لكن ما وصلتش لحاجة غير لمقبرة اتقال انها ماتمش اكتشفها.. وهي مقبرة امنحتب الخامس.. وفيه خريطة بتوضح مكانها.. لكن محدش قدر يستدل على مكانها في مصر او حتى خارج مصر؟!

 

وعلى حسب الكلام أن في أسطورة بتقول ان كان في ملك مصري اخد تابوت العهد وكتب كتاب اسمه ( الحياة والنهاية) ومكتوب فيه أسرار تابوت العهد.. الملك ده أخد التابوت والكتاب وخباهم في مقبرته..

 

فين هي مقبرته دي؟ ومين هو الملك المصري؟ ده اللي الدكتور إبراهيم بيبحث عنه..

 

وأكيد هنعرف في الحلقات الجاية..

 

صابر بياخد امينة وجمال ويقعدوا في بيت امه اللي ماتت.. عشان يحميها من حمزة اخوها.. وجمال بيسال صابر ليه مخلتناش نتجوز ما يمكن ده الحل.. لكن صابر بيقول له ان اللي على امينة جن عاشق ومش هيسيبها..

 

يعني لازم الأول يخلصها منه..

 

ف تاج نفس قصة امينة جنية عاشقة لصابر وهتفضل وراه وتساعده عشان تنوله في الأخير..

 

هو مش المسلسل اسمه أسطورة العشق؟

 

يعني بيناقش فكرة الجن العاشق..

امينة اللي عاشقها قزح..

وصابر اللي عاشقه تاج!..

 

سلام

 

تحليل ا.محمدمهني